Thursday, September 29, 2022

मुख्यमंत्री एकनाथ शिंदे यांच्याकडून बंडखोर आमदारांना झुकते माप देण्यास सुरुवात; नांदेड उत्तरमध्ये रस्ते विकासासाठी 202 कोटींच्या निधीला मंजुरी

ग्रुपमध्ये सहभागी होण्यासाठी क्लीक करा…👆🏻

नांदेड उत्तर वळण रस्त्यासाठी 150 कोटी तर शहरातील रस्ते विकासासाठी 52 कोटी रुपये तातडीने मंजूर

नांदेड– नांदेड उत्तर विधानसभा मतदारसंघातील रस्ते विकासासाठी आवश्यक असणारा निधी खेचून आणण्यात आमदार बालाजी कल्याणकर यांना यश आल्याचे दिसून येत आहे. मुख्यमंत्री एकनाथ शिंदे गटात सहभागी झालेले आमदार बालाजी कल्याणकर यांच्या मतदार संघातील नांदेड उत्तर वळण रस्त्यासाठी 150 कोटी रुपयांचा निधी मंजूर करून घेतला आहे. शिवाय नांदेड शहरात सुरू असलेल्या विविध रस्ते विकास कामांसाठी तातडीने 52 कोटी रुपये मंजूर करून घेतले आहेत. आमदार बालाजी कल्याणकर यांनी याबाबतची माहिती कळवली असून मुख्यमंत्री एकनाथ शिंदे यांनी संबंधित विभागाला आमदार बालाजी कल्याणकर यांनी सुचवलेली कामे प्राधान्याने करा असे आदेशित केले असल्याची माहितीही देण्यात आली आहे. एकीकडे महाविकास आघाडी सरकारच्या काळात मंजूर करण्यात आलेल्या निधीला स्थगिती देण्यात येत असताना दुसरीकडे बंडखोर आमदारांना भरघोस निधी दिला जाणार असल्याचे याद्वारे स्पष्ट करण्यात येत असल्याचे दिसून येत आहे.

याशिवाय हिंगोलीकडे वर्ग करण्यात आलेली दोन अत्यंत महत्त्वाची कामे सार्वजनिक बांधकाम विभाग नांदेडकडे पुन्हा खेचून आणण्यासाठी यशस्वी प्रयत्न केल्याची माहिती आमदार कल्याणकर यांच्याकडून देण्यात आली आहे. मुख्यमंत्री एकनाथ शिंदे यांनी संबंधित अधिकाऱ्यांना बजावून सांगत आमदार बालाजी कल्याणकर यांची कामे प्राधान्य करा अशी निर्देश दिले असल्याची माहितीही आमदार कल्याणकर यांच्याकडून देण्यात आली आहे. त्यांनी या भागातील रस्ते विकासासाठी तब्बल 780 कोटी रुपयांच्या निधीची मागणी केली आहे.

नांदेड उत्तर मतदार संघात 2020 मार्च च्या अर्थसंकल्पात नांदेड शहरासाठी 65 कोटी रु चा उत्तरी वळण रस्ता मंजूर करण्यात आला. परंतु भूसंपादनासाठी 65 कोटी रुपये खर्च करण्यात आले. उत्तरी वळण रस्त्यासाठी निधीची कमतरता असून सदरील निधी पुढील अर्थसंकल्पात मंजूर करावा अशी मागणी आ. बालाजी कल्याणकर यांनी केली. तसेच या अर्थसंकल्पामध्ये नांदेड उत्तर विधानसभा मतदारसंघातील रुपये 145 कोटीची दोन कामे मंजूर करण्यात आली; सदरील दोन कामांचे टेंडर न काढता चेंज ऑफ स्कोप याद्वारे कामे बहाल करण्यात आली. सदरील दोन्ही कामांची निविदा सार्वजनिक बांधकाम विभाग नांदेड यांच्याकडून न काढता सार्वजनिक बाधकाम विभाग हिंगोलीकडे सदरील कामे वर्ग करून निविदा काढण्यात येत होत्या. या कामांची निविदा माझ्या मतदारसंघातील सार्वजनिक बांधकाम विभाग नांदेडकडून काढण्यात यावी अशी मागणी आमदार कल्याणकर यांनी मुख्यमंत्र्यांकडे केली. तसेच या कामात परभणी जिल्हा सीमा ते पूर्णा नांदेड रसूराची दुपदरी करण्यासाठी पेवर शोल्डर सह सुधारणा करणे रामा 61 किमी 452/00 ते 465 / 505 तालुका जिल्हा नांदेड 90 कोटी आणि हिंगोली जिल्हा सीमा ते आलेगाव निळा नांदेडचे दुपदरीकरण करण्यासाठी देवर सोल्डर सहज सुधारणा करणे रामा 256 किमी 60 / 400 ते 70/ 900 तालुका जिल्हा नांदेड 55 कोटी या कामांचा यात समावेश आहे अशी माहिती आ. कल्याणकर यांनी मुख्यमंत्री एकनाथ शिंदे यांच्या समोर मांडली.

या माहितीची मुख्यमंत्री एकनाथ शिंदे यांनी गांभीर्याने दखल घेत, सदरील दोन्ही कामे नांदेडच्या सार्वजनिक बांधकाम विभागामार्फत करण्याचे आदेश दिले असून येत्या दहा दिवसात नवीन निविदा काढण्याचे आदेशही देण्यात आले आहेत. हिंगोलीकडे देण्यात आलेली दोन्ही कामे रद्द करण्याचे आदेश मुख्यमंत्र्यांनी तात्काळ दिले आहेत. याशिवाय मालेगाव ते तरोडा या रस्त्याच्या चौपदरीकरणासाठी  यापूर्वी 12 कोटी रुपये मंजूर झालेले आहेत आणि रस्त्याच्या चौपदरीकरणासाठी भूसंपादनाला सुद्धा निधी उपलब्ध करून देण्यात आलेला आहे. लवकरात लवकर सदरील रस्त्याचे चौपदरीकरण करण्यासाठी निधी उपलब्ध करून देण्यात यावा अशी मागणीही आ. बालाजी कल्याणकर यांनी केली होती. या कामाला तात्काळ सुरुवात करण्याचे निर्देशही मुख्यमत्र्यांनी दिले आहेत.

नांदेड मतदारसंघामधील नांदेड शहरातील रस्त्यांसाठी विशेष रस्ता दुरुस्ती अंतर्गत 338 कोटी रुपये मंजूर करण्यात आले होते, त्यापैकी माझ्या मतदारसंघात 190 कोटींची कामे करण्यात येत आहेत. या कामांना मंजुरी असली तरी बजेट नाही त्यामुळे निधी मंजूर करावा अशी मागणी आ. कल्याणकर यांनी केली होती. यासाठी मुख्यमंत्र्यांनी तातडीने ५२ कोटी रुपये मंजूर केले आहेत. उर्वरित निधी लवकरच मिळेल असा विश्वास आ. बालाजी कल्याणकर यांनी व्यक्त केला आहे. नांदेड शहरातील शासकीय विश्रामगृह व ईबीसी वसतिगृहाचे इमारतीचे काम त्वरित चालू करण्याचे आदेशही मुख्यमंत्र्यांनी दिले आहेत.

दर पावसाळ्यात असणार नदीला येणाऱ्या पुरा मुळे मोठ्या प्रमाणात अडचणी निर्माण होतात. अनेक जण पुराच्या पाण्यात वाहून जाऊन मृत्यू झाल्याच्या घटनाही यापूर्वी घडल्या आहेत. भविष्यात आपल्या मतदारसंघातील कोणत्याही नागरिकाचे प्राण पुरात वाहून जाऊन जाऊ नयेत यासाठी आमदार बालाजी कल्याणकर यांनी आसना नदीवर पासदगाव येथे पूलाच्या बांधकामास तातडीने सुरुवात करावी अशी मागणी केली होती. सन 2020 मध्ये 32 कोटी रुपयांचा पूल येथे मंजूर करण्यात आला आहे, मात्र सदरील कामाची निविदा करण्यात आली नाही ही बाब आमदार बालाजी कल्याणकर यांनी मुख्यमंत्री एकनाथ शिंदे यांच्या निदर्शनास आणून देताच मुख्यमंत्री एकनाथ शिंदे यांनी ॲक्शन मोडवर येत सदरील कामाची निविदा येत्या दहा दिवसात काढा असे आदेशित केल्याची माहिती आमदार बालाजी कल्याणकर यांनी दिली आहे. 

नांदेड शहरालगत असलेल्या आणि जिल्ह्यातील सर्वात मोठ्या वाडी बुद्रुक येथे शंभर खाटांचे उपजिल्हा रुग्णालय मंजूर करण्यात आले. सदरील रुग्णालय इमारतीचा भूमिपूजन सोहळा थाटात पार पडला होता, मात्र दोन महिन्याचा कालावधी लोटला असताना सुद्धा या कामाची निविदा लावण्यासाठी विलंब होत आहे अशी माहिती आमदार बालाजी कल्याणकर यांनी मुख्यमंत्र्यांसमोर मांडली या कामाची सर्व निविदा तातडीने काढा असे आदेश मुख्यमंत्री एकनाथ शिंदे यांनी दिले आहेत. मुख्यमंत्री एकनाथ शिंदे आपल्या पाठीशी असून आगामी काळात नांदेड उत्तर विधानसभा मतदारसंघातील सर्व रस्ते चकाचक दिसतील असा विश्वास आमदार कल्याणकर यांनी एका प्रसिद्धी पत्रकाद्वारे व्यक्त केला आहे.

अतिवृष्टीमुळे खराब झालेले रस्ते आणि पूलांची कामे तात्काळ पूर्ण करा : मुख्यमंत्र्यांचे संबंधित यंत्रणेला आदेश नांदेड उत्तर विधानसभा मतदारसंघात झालेल्या अतिवृष्टीमुळे रस्त्यांचे आणि पुलांची अतोनात नुकसान झाले आहे. परिणामी वाहन चालक प्रवासी आणि सर्वसामान्य नागरिकांचे हाल होत आहेत. त्यामुळे अनेक भागांचा संपर्क तुटला असल्याने अतिवृष्टीत खराब झालेल्या रस्त्यांची कामे शिवाय पुल उभारणीचे कामे प्राधान्याने करावेत अशी मागणी आमदार बालाजी कल्याणकर यांनी मुख्यमंत्र्यांकडे केली होती. यावेळी मुख्यमंत्री एकनाथ शिंदे यांनी संबंधित विभागाला आमदार बालाजी कल्याणकर यांनी सुचवलेली कामे प्राधान्याने करा असे आदेशित केले असल्याची माहितीही देण्यात आली आहे.

दरम्यान, नांदेड शहरा लगत  नांदेड बायपास  साठी नांदेड शहर पश्चिम वळण रस्त्याचे उर्वरित कामासाठी 200 कोटी रुपये  व नांदेड शहराच्या उत्तरी बाह्य वळन रस्त्यासाठी 150 कोटी रुपये यामुळे नांदेड शहरालगत बाहेरचा बायपास लवकरात लवकर पूर्ण होण्यास मदत होईल व त्यामुळे नांदेड शहरातील वाहतुकीची समस्या सुटेल असा विश्वास आ. बालाजी कल्याणकर यांनी व्यक्त केला.

आमदार कल्याणकर यांनी प्रामुख्याने केलेल्या मागणीच्या समावेश खालील प्रमाणे

1. विश्रामगृह पावडेवाडी नाका मोर चौक ते छत्रपती चौकापर्यंत सीसी रस्ता व नाली बांधकाम करणे रामा 61 चा लिंक रस्ता क्रमांक पाच किमी 0/00 ते 2/860 तालुका जिल्हा नांदेड

2.भाग्यनगर टी पॉइंट ते डॉक्टर शंकररावजी चव्हाण पुतळापर्यंत सीसी रस्ता व नाली बांधकाम करणे रामा 61 चा लिंक रस्ता क्रमांक 1 किमी 0/00 ते 1/050 तालुका जिल्हा नांदेड

3.आनंद नगर चौक ते महादेव दाल मिल व्हीआयपी रोड पर्यंत सीसी प्रस्तावनाली बांधकाम करणे रामा ६१ चा लिंक रस्ता क्रमांक आठ किमी 0/00 ते 0/725

4.नांदेड जिल्ह्यातील नांदेड शहर पश्चिम बाह्य वळण रस्त्याची उर्वरित सिमेंट काँक्रिटीकरण नाली बांधकाम रस्ता दुभाजक संगम स्थळ सुधारणा व सेवा वाहिन्या सुधारणा करणे किमी 0/00 ते 4/300 रामा 247( उर्वरित काम )

5.स्नेहनगर शासकीय एकत्रित निवासस्थाने परिसरात अधिकारी व कर्मचारी यांची निवासस्थाने बांधणे

6.नांदेड शहरातील स्नेहनगर पोलीस वसाहतीतील अधिकारी व कर्मचारी यांची इमारतीची पुनर्बांधणी करणे

ग्रुपमध्ये सहभागी होण्यासाठी क्लीक करा…👆🏻

Related Articles

LEAVE A REPLY

Please enter your comment!
Please enter your name here

Stay Connected

0FansLike
3,506FollowersFollow
0SubscribersSubscribe

Latest Articles

error: Content is protected !!